Merry Christmas 2013

祝大家聖誕快樂 Merry Christmas

一次過將最近影既商場聖誕佈置貼晒出黎 ^^

本地楓葉

上星期見同事傾開本地有紅葉睇，見網上有D相都影後幾靚， 又學人地睇下。

呢個本地紅葉景係元朗大棠郊野公園，按網上既資料，都好容易去。入到去呢個公園，再行就會見到。

一路行都會見到有少量既楓樹，去到呢個位，就係重點......不過我都幾失望，D葉都唔多紅，始終係香港，溫差唔夠大。同埋呢D楓樹品種問題，D紅色唔多鮮。不過唔使錢係咁上下，唔好有太高要求。同埋呢度都唔少人，你想要影人同景係冇可能，只能夠影下楓葉close up~

其實呢啲品種既楓葉，順光影唔靚，一定要搵D逆光位黎影先會好少少~

影完再執執佢，先可以見得下人 :P

如果當係行下山順便影下都OK，專程入黎影就唔係太值得咯~

單車樂

秋色漸近，呢啲日子最好出外活動。最近去左踩單車。

都係例牌果條路線，吐路港海邊。 

踩到去一個碼頭時，見到好多阿金既親戚，影下佢地先~

貓：喂，咪偷影喎~

貓：費事理你，曬下日光浴~

遠望八仙嶺，都好靚~

踩踩下，又發現係鐵絲網度有D咁既野~

原來有好多人係度玩同心鎖喎，都有點浪漫呢~

鎖會老，鐵絲網會老，希望佢地愛未老~

我地仲帶在啲野食去，當埋野餐咁玩 :P

馬鞍山乜原來咁高~

果日有個藍天，真係心情都靚啲~

可憐的豆

話說最近係屋企發現間唔中有D血漬出現，我同老婆一路都以為係阿金，但一路都搵唔到傷口，唔通佢內傷？

係星期六，我地無意中發現原來D血係阿豆架，真係估唔到原來係佢。阿豆一向比我地既感覺，係古古惑惑，但低低能能，但好健康；同埋佢個外型係young過阿金好多。佢係隻後腿度生左一粒瘤，我地發現時，仲流緊血，都幾慘幾核突.....拿拿聲帶佢去睇醫生。

作為"宅男"既阿豆，從來都唔出門，要捉佢入呢個籠，都費左我地唔少心機同時間。去到醫生度，佢已經嚇到傻晒.....

醫生最後診斷為一D 已經壞死左既瘤，仲即時同佢處理埋，都算好彩咯。不過就要札住隻腳止血同埋要係傷口度茶藥膏。

因為怕佢會"Lam"D藥膏，仲要同佢帶住個"喇叭罩"。你睇佢個樣幾唔鐘意~

見佢個樣實在太可憐，我最後忍唔住幫佢除左個 "喇叭罩"，俾佢鬆一鬆。

原先諗住都搞掂晒，第二日就可以幫佢拆埋條紅色既崩帶。點知呢隻衰野，死都唔肯俾我地搞佢隻"痛腳"，只要一掂下佢，佢就發晒惡想咬人抓人.....我從來未見過佢咁惡~

搞佢唔掂，最後又要出動個貓籠，幾經辛苦先捉到佢入去，又要去醫生度搞。

呢隻衰佬金，佢平時一見到我地攞個貓籠出黎，佢又係驚到死，但今次佢發現"目標"唔係佢，一D都唔驚，仲係度他他條條懶懶閑，一副關人鬼事既衰樣~

去到醫生度，合三個人既力量，終於都拆左崩帶，睇番個傷口，都埋口得幾好，又冇再流血。因為冇左崩帶，又要幫佢戴番個"喇叭罩"。佢即時又憂鬱......

除左茶藥膏，仲有一D藥丸要食。而家我地每餐既任務，係點樣另阿豆食藥丸。最後我地用到"誘食掩眼法"，買左D貓零食，將粒藥丸塞入去，漁目混珠咁等佢食左都唔知~ :D

雖然佢帶住"喇叭罩"，但訓起黎個衰樣仍然係冇變......